अनुसूचित जातींचे उपवर्गीकरण तत्काळ रद्द करा; उद्या कोल्हापुरात जिल्हाधिकारी कार्यालयासमोर ‘तीव्र निदर्शने व धरणे आंदोलन’
कोल्हापूर: प्रतिनिधी
अनुसूचित जातींच्या उपवर्गीकरणाला तीव्र विरोध दर्शवण्यासाठी आणि ते तत्काळ रद्द करण्यात यावे या प्रमुख मागणीसाठी उद्या, सोमवार दिनांक १८ मे २०२६ रोजी कोल्हापुरात भव्य आंदोलनाचे आयोजन करण्यात आले आहे. ‘अनुसूचित जाती आरक्षण बचाव कृती समिती, कोल्हापूर’ यांच्या वतीने हे तीव्र निदर्शने व धरणे आंदोलन करण्यात येणार आहे.
मिळालेल्या माहितीनुसार, उद्या सकाळी १०:३० वाजता माननीय जिल्हाधिकारी कार्यालय, कोल्हापूर येथे या आंदोलनाला सुरुवात होईल. अनुसूचित जातींच्या आरक्षणामध्ये उपवर्गीकरण करण्याचा निर्णय समाजहिताला बाधा आणणारा असल्याचा सूर कृती समितीने व्यक्त केला आहे. हे उपवर्गीकरण तातडीने रद्द करावे, या एकच मागणीसाठी सर्व समाजबांधव आणि कार्यकर्ते एकत्र येणार आहेत.
या आंदोलनात मोठ्या संख्येने सहभागी होऊन आपल्या हक्कांसाठी आवाज उठवावा, असे आवाहन ‘अनुसूचित जाती आरक्षण बचाव कृती समिती, कोल्हापूर’ यांच्या वतीने करण्यात आले आहे. आंदोलनाच्या पार्श्वभूमीवर जिल्हाधिकारी कार्यालय परिसरात चोख पोलीस बंदोबस्त तैनात असण्याची शक्यता आहे.
…………
