अवसायनातील दूध संस्थांच्या सुनावणीला गती द्या; ‘गोकुळ’चे संचालक अभिजित तायशेटे यांचे सहायक निबंधकांना निवेदन
कोल्हापूर : प्रतिनिधी
व्हिजन मराठी न्यूज
…………..
कोल्हापूर जिल्हा सहकारी दूध उत्पादक संघ (गोकुळ) शी संलग्न असलेल्या आणि सध्या अवसायनात निघालेल्या ११०० हून अधिक दूध संस्थांच्या सुनावणी प्रक्रियेला गती देण्याची मागणी ‘गोकुळ’चे संचालक अभिजित तायशेटे यांनी केली आहे. या संदर्भात त्यांनी कोल्हापूरचे सहायक निबंधक (दुग्ध) कृष्णा ठाकरे यांची भेट घेऊन त्यांना सविस्तर निवेदन सादर केले.
प्रलंबित नोटिसांमुळे संस्था अडचणीत
‘गोकुळ’ला दूध पुरवठा करणाऱ्या अनेक संस्थांबाबत तक्रारी प्राप्त झाल्यानंतर त्यांच्यावर अवसायनाची कारवाई करण्याचे आदेश देण्यात आले होते. सध्या या संस्थांची पात्रता तपासणी आणि सुनावणीची प्रक्रिया सुरू आहे. मात्र, राधानगरी आणि शाहूवाडी तालुक्यातील अनेक दूध संस्थांना अद्याप सुनावणीसाठीच्या नोटिसाच मिळालेल्या नाहीत. यामुळे या संस्थांचे भवितव्य टांगणीला लागले असून, त्यांचे म्हणणे मांडण्याची संधी त्यांना मिळालेली नाही.
तात्काळ सुनावणी घेण्याची मागणी
संचालक अभिजित तायशेटे यांनी निवेदनात नमूद केले की, ज्या संस्थांना अद्याप नोटीस मिळालेली नाही, त्यांना ती तातडीने बजावण्यात यावी. तसेच, ज्यांची सुनावणी प्रक्रिया अर्धवट आहे, ती तातडीने पूर्ण करून दूध संस्थांना न्याय मिळवून द्यावा. काही तालुक्यांमध्ये केवळ नोटीस देऊन पुढील प्रक्रिया थांबली आहे, ती प्रशासकीय पातळीवर वेगाने हलवणे गरजेचे असल्याचे त्यांनी यावेळी स्पष्ट केले.
ताराबाई पार्क येथील सहायक निबंधक कार्यालयात हे निवेदन देण्यात आले. यावेळी राधानगरी तालुक्यातील दूध संस्थांचे प्रतिनिधी मोठ्या संख्येने उपस्थित होते. सुनावणी प्रक्रियेतील या विलंबामुळे दूध उत्पादक शेतकऱ्यांमध्ये चिंतेचे वातावरण असून, प्रशासनाने यावर तातडीने सकारात्मक पाऊल उचलावे, अशी मागणी जोर धरत आहे.
………
