शिक्षकांना जून महिन्यातच जनगणनेचे कामकाज द्यावे; आमदार जयंत आसगावकर
– शिक्षणमंत्र्यांकडे निवेदनाद्वारे केली मागणी
कोल्हापूर : प्रतिनिधी
व्हितन मराठी न्यूज ( सागर सरदेसाई )
राज्यात सध्या उन्हाची तीव्रता प्रचंड वाढली असून, या कडक उन्हात शिक्षकांना जनगणनेचे काम करावे लागत आहे. या वाढत्या उष्णतेमुळे शिक्षकांना मोठ्या प्रमाणावर शारीरिक अडचणी निर्माण होत असून, दुर्दैवाने काही शिक्षकांना आपला जीवही गमवावा लागला आहे. या गंभीर परिस्थितीचा विचार करून शिक्षकांना जनगणनेचे कामकाज जून महिन्यात करण्याची मुभा द्यावी, अशी आग्रही मागणी आमदार जयंत आसगावकर यांनी केली आहे.
या संदर्भात आमदार जयंत आसगावकर (विधान परिषद सदस्य, पुणे विभाग शिक्षक मतदारसंघ) यांनी मंगळवार, दिनांक २६ मे रोजी शालेय शिक्षणमंत्री दादासाहेब भुसे यांची मुंबई येथील ‘जंजिरा’ बंगल्यावर प्रत्यक्ष भेट घेतली आणि त्यांना मागणीचे निवेदन सादर केले.
शिक्षकांच्या आरोग्याचा प्रश्न गंभीर
निवेदन देताना आमदार जयंत आसगावकर म्हणाले की, “सध्या राज्यामध्ये उन्हाचा कडाका खूप जास्त आहे. अशा अत्यंत प्रतिकूल हवामानात जनगणनेचे काम करताना शिक्षकांना तीव्र शारीरिक त्रास सहन करावा लागत आहे. उन्हाच्या तीव्रतेमुळे काही शिक्षकांचा मृत्यू झाल्याच्या अत्यंत क्लेषदायक घटना घडल्या आहेत. त्यामुळे मानवतावादी दृष्टिकोन ठेवून शिक्षकांना हे काम जून महिन्यात, म्हणजेच पावसाळा सुरू झाल्यानंतर करण्याची परवानगी देण्यात यावी.”
शिक्षणमंत्र्यांचे सकारात्मक आश्वासन
आमदार आसगावकर यांनी मांडलेली बाजू आणि शिक्षकांची बिकट परिस्थिती समजून घेतल्यानंतर, शालेय शिक्षणमंत्री दादासाहेब भुसे यांनी या विषयाचे गांभीर्य मान्य केले. या मागणीबाबत राज्य शासनाकडून लवकरच सकारात्मक निर्णय घेतला जाईल, असे आश्वासन त्यांनी यावेळी दिले.
या महत्त्वपूर्ण मागणीमुळे राज्यातील हजारो शिक्षकांना वाढत्या उन्हापासून आणि आरोग्याच्या धोक्यापासून मोठा दिलासा मिळण्याची शक्यता निर्माण झाली आहे.
…………
