बाचणीत १० जूनपासून तीन दिवसीय राज्यस्तरीय व्हॉलीबॉल प्रशिक्षक शिबिराचे आयोजन
बाचणी : प्रतिनिधी)
व्हिजन मराठी न्यूज
……….
महाराष्ट्र व्हॉलीबॉल असोसिएशन आणि दिशा अकॅडमी, बाचणी (ता. कागल) यांच्या संयुक्त विद्यमाने व्हॉलीबॉल प्रशिक्षकांसाठी तीन दिवसीय तज्ज्ञ प्रशिक्षक उजळणी शिबिराचे आयोजन करण्यात आले आहे. हे शिबिर बुधवार, दिनांक १० जून ते शुक्रवार, दिनांक १२ जून या कालावधीत पार पडणार आहे, अशी माहिती आंतरराष्ट्रीय प्रशिक्षक प्रा. अजित पाटील यांनी बाचणी येथील दिशा अकॅडमीत आयोजित पत्रकार परिषदेत दिली.
आधुनिक तंत्रज्ञान आणि नियमांचे मिळणार धडे
पत्रकार परिषदेत माहिती देताना प्रा. अजित पाटील म्हणाले की, या तीन दिवसीय उजळणी वर्गामध्ये महाराष्ट्रातील प्रशिक्षकांना व्हॉलीबॉल खेळातील आधुनिक प्रशिक्षणाच्या पद्धती, नवनवीन डावपेच आणि बदललेले नियम यांविषयी सविस्तर माहिती व मार्गदर्शन केले जाणार आहे.
याशिवाय, विविध वयोगटांतील खेळाडूंचे दर्जेदार संघ कसे तयार करावेत, त्यांच्या दैनंदिन प्रशिक्षणाचे वेळापत्रक कसे असावे, याबाबत शास्त्रीय आणि शास्त्रशुद्ध पद्धतीने प्रशिक्षण दिले जाईल. हे प्रशिक्षण पूर्ण केलेले प्रशिक्षक आगामी काळात महाराष्ट्रातील आठही विभागांत अशाच प्रकारच्या उजळणी वर्गांचे आयोजन करून स्थानिक पातळीवर खेळाडू व प्रशिक्षक तयार करतील, अशी या शिबिराची मुख्य संकल्पना आहे.
आंतरराष्ट्रीय दर्जाचे मार्गदर्शक करणार मार्गदर्शन
या शिबिरात तज्ज्ञ प्रशिक्षक तयार करण्यासाठी क्रीडा क्षेत्रातील दिग्गज मंडळी मार्गदर्शन करणार आहेत. यामध्ये प्रामुख्याने:
प्रा. अजित पाटील (आंतरराष्ट्रीय व्हॉलीबॉल प्रशिक्षक, कोल्हापूर), लक्ष्मी नारायण (आंतरराष्ट्रीय प्रशिक्षक, बंगळूर), नीलेश मते (नागपूर), सौरभ रोकडे (आंतरराष्ट्रीय व्हॉलीबॉल पंच, नागपूर),नीलेश जगताप (सचिव, महाराष्ट्र राज्य व्हॉलीबॉल संघटना, पुणे), अनुराग नाईक (वरिष्ठ राष्ट्रीय खेळाडू, पुणे)
राज्यभरातून ५० जणांचा सहभाग
दिशा अकॅडमी, बाचणी येथे आयोजित होणाऱ्या या उजळणी वर्गामध्ये महाराष्ट्रातील एकूण आठ विभागांतून प्रत्येक विभागातील ५ प्रशिक्षक याप्रमाणे ४० प्रशिक्षक सहभागी होणार आहेत. याशिवाय ४ तज्ज्ञ मार्गदर्शक आणि संघटना प्रतिनिधी असे मिळून एकूण ५० जण या शिबिरात प्रामुख्याने उपस्थित राहणार आहेत.
पत्रकार परिषदेच्या वेळी प्राचार्या अरुणा पाटील, शिवाजी पाटील आदी मान्यवर उपस्थित होते. या शिबिरामुळे ग्रामीण भागातील व्हॉलीबॉल खेळाला आणि नवीन प्रशिक्षकांना मोठी चालना मिळणार आहे.
……….
