‘.गोकुळ ‘ च्या कामकाजाची दिशा योग्यच; आमदार शिवाजीराव पाटील यांच्या आरोपांना उत्तर देण्यास सदैव तयार : चेअरमन नाविद मुश्रीफ
कोल्हापूर : प्रतिनिधी
व्हिजन मराठी न्यूज
………….
कोल्हापूर जिल्हा सहकारी दूध उत्पादक संघ (गोकुळ) येथील आढावा बैठकीत बोलताना संघाचे अध्यक्ष नाविद मुश्रीफ यांनी संघाच्या प्रगतीचा आणि आर्थिक स्थितीचा सविस्तर आढावा मांडला. यावेळी त्यांनी गोकुळचा कारभार योग्य दिशेने सुरू असल्याचा ठाम विश्वास व्यक्त करत, विरोधकांनी केलेल्या आरोपांना उत्तर देण्यास संघ सदैव तयार असल्याचे स्पष्ट केले.
आरोपांना प्रत्युत्तर, पण संयमी भूमिका
बैठकी दरम्यान, आमदार शिवाजीराव पाटील यांनी केलेल्या आरोपांविषयी विचारले असता, चेअरमन मुश्रीफ यांनी अत्यंत संयमी भूमिका मांडली. ते म्हणाले, “त्यांनी कधीही सांगावे, आम्ही त्यांच्या सर्व प्रश्नांची सविस्तर उत्तरे देण्यास पूर्णपणे तयार आहोत.” मात्र, अनेक प्रश्नांना थेट शब्दयुद्ध टाळत त्यांनी यावेळी अधिक भाष्य करणे टाळले. प्रसारमाध्यमांनी विचारलेल्या काही प्रश्नांवर स्पष्टीकरण देत त्यांनी बैठकीत संघाच्या कारभारावर मूळ उद्देशावर लक्ष केंद्रित केले.
शेतकऱ्यांचे हित हेच सर्वोच्च
मुश्रीफ यांनी आपल्या भाषणात वारंवार एका गोष्टीचा उल्लेख केला की, ‘गोकुळ’ हा केवळ एक संघ नसून तो दूध उत्पादक शेतकऱ्यांच्या मालकीचा त्यांचा स्वतःचा हक्क आहे. ही मातृसंस्था आहे. संघाच्या प्रत्येक निर्णयात आणि दैनंदिन कामकाजात केवळ शेतकऱ्यांचे हितच केंद्रस्थानी ठेवले जाते. सभासदांचा विश्वास कायम राखणे ही आमची प्राथमिकता असून त्यासाठी संघ कटिबद्ध असल्याचे त्यांनी यावेळी अधोरेखित केले.
यावेळी संचालक मंडळ व अधिकारी उपस्थित होते
……..
